٥.٢١.٢٠٠٧
تاج مزدوج زى ابا اللهب .. :D
لولا ان انقطاعى عن كل حاجه الفترة اللى فاتت كان يغرينى انى انشر البوست اللى كاتباها من اسبوع وبفكر فيها من سنة ومش لاقيالها صورة ملائمة لكن لأنى لسه مش مستعدة لنشرها , ولأنى واقعة تحت نير الملل السخيف فانا حاخد القرار الشجاع , واستقبل التاج اللى برضك بيفكرنى بتاج محل فى الهند واللى رفض ابراهيم خليل انه يشوفه وهو فى الهند لأن كل الناس بتروح هناك .
لما لاقيت النقيب وإما ,بعتنلى لينك بالحماس الشديد ده أقسم بالله افتكرت مثلا .. مش عارفه افتكرت ان فى حاجه رهيبة جداً :)
....
وفيما بعد اكتشفت مصطفى كمان .. مش عارفه ليه نظام التاج بيفكرنى بالدكتور النفسى لما يقعد العيال الصغيرين قدامه والعيل يكون مقلق اصلاً وقلقان يسأله عن اسرار ويروح يقول لأهله ثم اذ فجأة يلاقيه بيسأله بيحب مازينجر اكتر ولا جراندايزر بس الحق يتقال , رغم استفزازا الاسئلة ساعات كداب اللى ينكر استمتاعه بان حد فاكره وباعتله تاج
..
يلا بأه انتوا كمان حتدوشونى بثرثرة فاضية !!! سبونى أطلع عين واضع الاسئلة بإجابات شـــ ــنـــ ـــيـــ ــعــ ــه
_______
أحب شخص لقلبك في الدنيا؟إنسان مستعد تضحي بحياتك - ركز فى كلمة حياتك - عشانه؟
اممممم .. مش عارفه فعلاً أنا بحب ناس كتييييييييييير جداً بس اقدر اقول ان فعلا اكترهم ماما والقردة الصغيرة أختى أما مسألة الحياة والتضحية وكده فأصلا الواحد مش ممكن يختار , بس اصلا فى الوقت الحالى انا ممكن اضحى بحياتى عشان بطيخة .. عادى يعنى البنى ادم اما بيحب الحياة بيضحى بيها عشان يحس بيها فبإذن الله اضحى بحياتى من اول ماما وبابا وأهلى مرورا بالعيال القلل كلهم والناس اللى ماعرفهومش لو اتقدر لى انى انال شرف انى اكون سبب فى احياء حياة تانية لحد البطيخة اللى جايبها عم مرسى لاولاده وخايف لاتقع من الاتوبيس , وفى الواقع انا اتمنى ان تكون حياتى فدا اى حياة تكون احسن منى , ده الشئ الوحيد اللى يثبت ان الواحد جه الدنيا وعمل حاجه
ليها فايده خاصة اننا كده كده اصلاً اموات
-
-
.
إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
يوووووووووووووه كتير جداً موت أصلاً , انا قبل ما انام بقتلى قول كده 5 ولا 6 , كل الناس المؤذية اللى بتزود التعاسة وتخلى الناس حزانى مقدرش اصلاً انام الا لو قتلتهم كلهم , لكن فى الحقيقة الحقيقة اقتل حد ويتحمل ضميرى ده ولا اجروء أصلاً , يمكن شخص واحد فى حياتى كلها اللى لما كنت زمان بفكر فيه كنت بتخيل دمه مرمى على الارض بس مش ميت , ومالكش دعوة اصلاً هو مين .
-
-
ما هو:اسم أجمل كتاب كتبه بشر قرأته ومحتفظ به حتى الان؟
كتاب فيرونيكا تقرر ان تموت طبعاً طبعاً طبعاً وشايلاه فى مكان خاص جداُ فى اوضتى ومش ممكن اطلعه ابداً بره البيت , رغم انى قريته مرة واحدة بس لكن حافظة منه مقاطع معينة لأنى تشبعت بيه بصورة مرضية , وده حيبان فى البوست الللى كان المفروض اببلشه النهارده واللى مش لاقياله صورة تليق عليه .
التراجيديا الانسانيه بتاع نجيب سرور مذهل اصلاً . كنت زمان بقول كده على ساحر الصحراء بتاعت كويليو بس بعدين فوقت طبعاً لأن عناصر الكون مش حق حصرى لحضرتى .
ورواية رومانسية اسمها الموت حباً , مذكرات السيدة راء بتاع رضوى عاشور والثلاثية المهولة طبعاً , وقصية الهلال باعت ميم البرغوثى ابنها . بس على فكرة كلمة محتفظ بيه ديه يا اخ ياللى حاطط الاسئلة مستفزة لأن المعظم مش لازم المتهم يموت فى الكتاب عشان يحتفظ بيه
-
-
.
اسم كتاب - كتبه بشر برضه - انت متعلق بيه وبتقرأه كل فترة؟
روايات دكتور احمد خالد توفيق , اى ورقة جورنال صفرا حتى لنجيب سرور, وهارى بوتر بكل اجزائه , وكان فيه قصيدة لميم سين اسمها مأساة الحلاج وقصة اسمها ذات شتاء على رصيف ما وقصيدة لشاكال باسم الجميلة والوحش , الاتنين مطبوعين ومحطوطين فى العلبة المقدسة اللى فيها فيرونيكا .
-
-
أهم جهاز منزلى أنت متعلق بيه أو بتستخدمه كتير؟
اممممم .. مش عارفه , انا مش بحب الاجهزة اصلا ومش ممكن اتعلق بيها بس ممكن نقول انه المايكروويف لأنى كنت بحط فيه سندوتشات واطباق الجبنة الرومى عشان تدوب .. قبل ما اتمنع منها .
-
-
مكان تحس بالراحة عندما تدخله؟
بيت الجدة .. بيت تيته فى البلد رغم انعدام وسايل الرفاهية .. , واى مكان تشع منه حالة الاحتواء , وده احيانا فى بيوت خالاتى واعمامى .
-
-
شيء تحس بالراحة النفسية عندما تنظر إليه؟
عنين ماما لما تكون فرحانة بجد وصافية , واى وش مبتسم وياخراشى لو كانت عيلة قزعه , أوبا وسلواعه - محدش يسألنى يعنى ايه اوبا وسلواعه بس مامة روان بنت الجيران بتقول عليها كده - وعيال العصابة كلهم لما تجيلهم حالات الهيستريا ويفضلوا يضحكوا على حاجه عبيطة والناس تتفرج علينا وحد يكلم ويبان فى عنيه صدق حقيقى .
-
-
مكان تحس فيه بالحنين الى شيء لا تدرى ماهو و ذكريات جارفة الى لاشيء؟
البحر
-
-
اجمل مدينة زرتها داخل مصر ؟
معلش يا رفيق نقيب , انا روحت 8 محافظات تقريبا منهم الاسماعيليه بس بجد بجد مفيش زى اسكندرية .. ياعم ده بحر الاسماعليه اصلاً زيت المراكب هاريه ..
-
-
أجمل مكان طبيعي رأيته داخل مصر ؟
شكل جبال شرم الشيخ , منظر الغروب على بحر اسكندرية .
-
-
شخصية كارتونية بتحبها؟
احم احم .. اهو انا مبحبش الاسئلة المحرجة ديه ابداً .. طبعا عزيز عينى وقلبى ( جواد ) من مسلسل سلام دانك بتاع سبيس تون وسعد فى نفس المسلسل , بسام ومازن ووليد وكابتن ماجد من كابتن ماجد , ومازنجر اللى ليه خمس حلقات عندى على شريط فيديو فى نفس الكرتونة المقدسة بتاعت فيرونيكا , الفريدو بتاع عهد الاصدقاء الولد ده كان بطل بجد , فان من مسلسل داى الشجاع , السيد فيتالس و ماتيو من ريمى , وطبعا جمال من فرسان الارض , دورى فى نيمو .
-
-
نوع هاتفك المحمول؟
امممم مش فاكرة الرقم بالظبط , لما جم يغيرولى التلاتلاف وحاجه ده قلت لاختى عايزا حاجه فيها راديو وهى اختارت ياستين تلاين يا
تلاتين ستين , وبعد شهر صرخت وانا نايمة وقلتلها الحقى الموبايل ألوان وفيه أزرق وأخضر , انا مش قلت مابحبش الاجهزة !! أوف
-
-
سرعة بروسيسور جهازك؟
معرفش ايه البروسيسر ده اصلاً .
-
-
حجم ذاكرة -هارد- جهازك؟
فكرت أغش الاجابة من إما أو اتصل بحد من ولاد خالتى بس مش مستاهلة أصلاً , ماعرفش هه
.
-
-
المساحة التى تشغلها المواد الاسلامية على جهازك؟
مش مجاوبة عشان ماعرفش ونوت انتريستنج كمان .. قاضينى
.
-
-
نفس المساحة السالف ذكرها فى قلبك -الإجابة لنفسك عشان الرياء يا اخواننا -؟
ينقص ويزيد , زى البدر , وماحدش بيفضل على حاله وفى الوقت الحالى ويارب يهدينى ويهدى الكل انا بعيدة كتير اوى ومشغولة بفلسفات مالهاش لزمة اصلاً , بس اللى انا متأكده منه اوى , انى بحب ربنا أوى عشان هو حلو أوى وكريم أوى أوى أوى
.
-
-
أهم هدف انت واضعه لحياتك الآن؟
لحد كام شهر فات كنت ممكن أقولك ياعم يابتاع الاسئلة بس دلوقتى الضباب كتير , وفعلاً ماعدتش قادرة أفرق ما بين اللى انا راغباه , ومابين اللى بأقلم نفسى عليه , بس عامة اكتر حاجه بفكر فيها السفر
.
-
-
مواصفات فتى \فتاة الأحلام بالنسبة لك ؟
انه يكون حر .. حر من كل حاجه .. حر من سجاير حطاه فى اسرها , حر من نومة يقدر يحرم نفسه منها عشان ينزل يصلى الفجر فى الجامع , حر فى كل كلمة يقولها , مايخافش ابداً ويكدب أو يهرب ,يكون صادق مع نفسه أوى لأن ده الشئ الوحيد اللى حيخليه يحس بطعم كل حاجه من غير مرارة الرياء ولا الكدب والتصنع , ويفضل يحاول يربيها طول ما هو عايش , يكون بيحب ربنا أوى أوى .. ويكون انسان بجد .
يكون حاجه كده .. حاجه كده .. عارفين نجيب سرور لما بيقول
" ليس فى الارض حبيب كحبيبى , ليس فى الروض حبيب كحبيبى "
مش عارفه احدد حاجه بعينها , يمكن ابلغ كلمة انه مايكونش بطل بس يفضل طول حياته يحاول .. .
-
-
صف ما يأتى:شعورك لما بتسمع كلمة مصر ؟
بفتكر ان اختى عندها طقم بتلبسه ليه طرحة ابيض واسود واحمر ورا بعض .
-
-
شعورك لما بتسمع كلام عن اليهود؟
بعد الفصل بين اليهودية والصهيونية , بتزيد سرعة الدم فى عروقى واقول لنفسى اصبرى يابت بكرى تمسكى الار بى جى بأه .
-
-
شعورك لما بتشوف ظابط شرطة؟
كنا فى محطة الرمل وكان فى ظابط انعور اوى كده , جت نانا جمبه وفضلت ترمى عليه بالكلام ونضحك , بس فى الاحوال العادية بفتكر ايام ما كنت عايزا اطلع ظابط واتجوز ظابط وكانت ماما تقولى حنحط اسمك على الباب عشان الحرامية تخاف . وبفتكر سوكا صاحبتى لما عاكسها ظابط وهو قاعد فى عربيته وفضل يضايقها ولما شتمته خرج من العربية , فلاقته طويل اوى اتخضت وقالت مين اللى حك المصباح . ضغط دمى مايستحملش اكتر وانا بحاول مافتكرش صاحبتى التانية اللى بصت لاقت ظابط فى اوضة نومها عشان قضيه هما اصلاً مالهمش دعوه بيها ... يعنى , واشياء من هذا القبيل .
.
-
-
شعورك لما بتشوف الكناس العجوز فى الطريق؟
بسأل نفسى ازاى راجل فى السن ده ومالوش ولاد ياخدوه عندهم , وارجع واقول ان فى اهم من الايتام فى مصر بس احنا حنفضل عقول
استمبات
-
-
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده
المصحف؟
بقول ماشاء الله وادعى ربنا يكون بجد مش كده وكده , وهو حر فى طريقة تقربه من ربنا .
-
-
إحساس يراودك فى إشارة مرور مغلقة بسبب مسئول كبير؟
بقضى الوقت فى تخيل الطيارة وهى هربانه من هنا .
-
-
امرر التدبيسة لـ
نانا
بقايا بقايا
رون
بليلة
البت شو
ميراج
اوفيليا
البت اختى لما تخلص امتحانات وتعمل مدونة
شاتى
سروج
احمد السعيد
ولمن دخل مدونتى بقلب نقى وغير ..
