١.٠٧.٢٠٠٧
فى يوم ميلادى
فى يوم ميلادى
مازلت مصممة على كتابة هذا البوست رغم المحاولات الفاشلة لفعل الأمر .. بدايةً من اختلاف الحالة النفسية ألف مرة فى اللحظة الواحدة , حتى كتابة أحلى بوست يطيره البلوج اثناء النشر
ديسمبر .
. اخر شهور العام .. يوم ميلادى .. برج القوس الشنيع, وكوكب المشترى ..القوة...الحيوية.. حظ الابراج مجتمعة .. ولا يعطيك الفرصة الا لبداية عام واحد جديد ..
اتممت ال22 وايام .. لأول مرة اشعر بأنه لا فارق بين عام واخر .. يتصل الجميع ليهنئنى على عام ماضى .. اكره الامر ولولا انى اكره ايضاً ان أنسى من قبل اهلى واصحابى لتمنيت ان ينسوا العام المقبل .. اكره حين يرن الهاتف " ايه بأه اللى حققتيه السنة اللى فاتت وناويه على ايه فى السنه اللى جاية " كأنى فى برنامج توك شو سخيف .. ورغم كل شئ إلا ان البسمة الغبية ترتسم على وجهى وضحكة عالية معتادة لأكرر أكلشيهات .. ويستمر العرض طوال اليوم .. كان السؤال الاسخف هذا العالم " حتحتفلى بيه ازاى ؟ " اضطررت لرد لا يمكن كتابته هنا , افتقدت صوت جدتى واحلى تهئنة .. " السنه اللى جاية تكونى اسعد " .. عادت جدتى وعاد البيت الكبير يمتلئ ضجيجاً .
طالما كان صوت منير و فيروز هو الخلفية الاساسية لأعوامى السابقة منذ كان والدى يبحث عن الاغنية لأسمعها فاصمت واكف عن الضجيج 0^0 شجر اللمون دبلان على ارضه 0^0 .. استيقظ فى الصباح ككلمة تمطها داليدا وتنهيها بانكسار .. بخفة احياناً .
كلما ظننت بانى مللت الحياة أفاجئ بأنى احبها اكثر .. وكلما ظننت بانى لن اتحمل اكثر أجدنى أستمتع .. نعمة الأمل كما يقولون .. يحسدونى احياناً على استيقاظى مسرورة لأنى مسرورة .. غنائى فى الصباح ودغدغة والدتى لأجل ومضة حلم بقرط يعجبنى ولم اشتريه .. عشقى لكرسى المائدة بمربعاته الصغيرة .. مراقصتى لصورة بحجم الكف .. مصافحتى لرضوى عاشور وتميم كل مساء على غلاف ( أطياف ) ..
الصورة بأسفل
جلست امامها ساعات وساعات .. اتأمل كل تفصيله .. كل قطرة دم .. كل سبب .. سمعت ارتطامها بالارضية الباردة .. عيناها تراقبان العنبة التى تكف عن التدحرج .. على هاتفى النقال حوالى 5 رسائل تحتوى كلمة واحدة ( عنب ) اكثر من شخص رأى الصورة يوماً أو قرأ الاقصوصة .. كانت هديتى بميلادى فلم أجد افضل منها يذكرنى باعوامى المتدحرجه تلو الاخرى .. تمر الايام كالذكريات .. تحاول التمسك بها لكنها تتسرب بخفة وكانها اصابع تنفلت من اصابع اخرى .. زهرة تظل ترويها , وتظل ذابله .. او شخص مات منذ اعوام ولم تعد تذكر منه سوى اسمه .. 9 , 10 .. مدرستى الضخمة كمدرسة هارى بوتر .. 15.. ..جيجى و داليا .. 17 .. منتديات .. اصحاب اكتر .. رون وبليله وايما وفيرا .. اصحاب اكتر اكتر .. كليه ودكاترة ..20 .. تليفون فى ساقية الصواى " مبروك .. تقدير عام جيد جداً ".. 21.. عام المتعه .. المنبر .. الزجاج السميك .. الامل والمستقبل.. العلم .. الجبال ..العالم .. الكرة الارضية ..22 .. وأول رقصة فى قلب الشارع .. شدة شعر لبنت ماشية على خط بحر .. ومهرج يطلع فى الاخر بطل اللعبة وسقراط مشنوق عشان وهم اسمه المنطق .. 5 ساعات على التليفون .. سقراط احمق .. والعنب العنب
العنب .. اذنى بفمى وانفى بكفى .. ومفيش غير ربنا حقيقة ..
احب الحياة ,وسأظل احبها ,احب اعوامى الماضيه .. لا اخجل منها لأنها جعلتنى ما انا عليه .. وحين تنسل العنبة الاخيرة .. النفس الاخير .. اتمنى ابتسامة رضا على ثغرى .. سعيدة .. واشفق على كل من لم يتعلم معنى الحياة .. وارثى لكل دقيقة لا يقضيها قلب فى الحب .. الحياة .. الطيران ..
ولا بأس بأمل وهبى تصرخ
لا اقـبـل حياة مُرة ولا اعيشها مضـطـرة "
حلمى البسيط مش مستحيل خيوطه فى ايديا
مهما يالـيـل تـقـدر تطول انا حلمى فى عـينيا
"ع الــمـاضى مـش اسفـة ولا م الجاى خـايـفـه
كل سنة وكلكم طيبين وأحلى
وكل سنة وانا اسعد
