١١.١٥.٢٠٠٧
الليل ملاح
ـــــــــــــــــــ
لا بيوصل شط و لا بيرتاح
**
الليل مشحون
أسرار و شجون
و ألم و نغم
و كاسات ونايات
و دموع و آهات
و عبر و حكم
ومشيت في الليل خجلان مكسوف
إكمن الليل عريان مكشوف
أفراح الناس و جراح الناس
على صدر الليل عناقيد و صفوف
**
و عيون الليل و الضلمه جبال
فاردين على وش السما غربال
ألماظ مبدور
في كاسات بنور
يفرش للنور
ع الأرض
.. خيال
**
و يشق سكون الليل أرغول
و نغم فنان ثاير مخبول
و عليل على فرشه بيتقلب
و يحايل جرحه المتداري
و يقول
يا طبيب قلبك طيب
اسمعني ح أقول لك أسراري
لو شلت الشكوى على لساني
و رميتها قريب ما تكونش جراحي مآلماني
أبدا ً يا طبيب ما انا دقت الجرح و خدت عليه
يسقيني المر و برضه اسقيه
من بحر الصبر اللي ف قلبي
حتقول لي بتشكي امال من إيه؟
و لا من أوجاع و لا شوق لمتاع
دانا عمري إن ضاع مش ح أبكي عليه
أبدا ً يا طبيب
**
يا طبيب دنا جرحي ملوعني
و ساقيني الحنضل من كاسي
و النار ف ضلوعي بتلسعني
و أنا لسه صغار و العيا قاسي
و لا عمر الليل مره سمعني
عليت الآه على انفاسي
أبدا ً يا طبيب
**
لكن يا طبيب أنا بابكي صحيح
و باقول الآه زي المجاريح
و دموعي في عيني بتتكلم
و بتتألم عل قلب جريح
مسكين كان أمله يجب سنين
و يلم الحب ف عشه اتنين و اتهنى معاه
و ان قال الآه أنا اقول له يا روح القلب آهين
بس انا لا بيدي ولا بودي
دا قدر مقسوم
قدر لحبيبي يعيش بعدي في الهوى محروم
أهو دا اللي وجعني و خلاني
حطيت الشكوى على لساني
إنما و حياة اللي قاسيته
و حياة الأمل اللي بنيته
و حياة القلب اللي جرحته
لا فرحت معاه و لا هنيته
لو شلت الشكوى على لساني و رميتها قريب
ما تكونش جراحي مآلما ني
أبدا ً يا طبيب
**
و ينام الصوت و الكون حواليه
ساكن نعسان و كأن الموت
رمى تقله عليه سكت العيان
**
الكاس له ناس
و الليل مجالات
و الحان مليان
و الناس مزجات
و مجال الكاس
اشكال اجناس
مليان حواديت
مليان روايات
**
و نزور بالليل دنيا الخمار
و نلاقي الكاس ع الناس دوار
و يموت الليل على باب الحان
حيخش إزاي و الدنيا نهار؟
و قلوب و نفوس كده عالمكشوف
عريانه تمام و تعالي نشوف
**
شوف دا اللي هناك قدامه كاسين
مع انه لوحده ما هوش اتنين !
و الناس بيبصوا و مش فاهمين
الكاس دا لمين والكاس ده لمين ؟
اهو دا اللي بنظرة عين شبكوه
و فاتوله الكاس مليان و فاتوه
و حكايته طويله وهمه تقيل
و ح اقولك ايه و اعيدلك ايه
راح يملا عيونه بحلم جميل
بياع السهد ملاله عنيه
**
و ترن ف جو الحان ألحان
نشوانه تخلي المولد .. هُس
و غزاله بتتغزل في حصان
و تقول له احبك انت و بس
و يفز هناك سيدنا المنظور
و يطب الكاس ف إديه مكسور
و يقول غشاشه حتلعب بيك
و يرد التاني عليه بفتور
طب و انت مزعل نفسك ليه؟
حشري و سخيف و ح اقول لك ايه
و ما نولي يقول موس اندك حق
و السامر يضحك لما يطق
و يحط الحشري عنيه في الارض
و كأنه لحن في الدين و الفرض
و يقوم يتطوح مره يمين
و يميل زي البخت شمال
و ف جوف الليل يغرق مسكين
لا يغير حالو لا يشغل بال
**
الحظ حمار من غير حمار
فقد التمييز زي المجانين
هجر البساتين عشق الدهاليز
و الحظ بطبع غباوته عنيد
و دماغه حديد
لو يعند حتى على الغزلان
ينسخطوا معيز
**
و نسيب دهليز و نخش ف باب
و نعدي الباب ندخل سرداب
و نلاقي ضحايا الليل واقفين
و الحظ بيلعب بالاعصاب
طبليه عليها نمر بنظام
من واحد يمكن لما الالف
و الدنيا بزي ما هي تمام على هيئة كور
ه تدور و تلف
و شنب مفتول يصرخ و يقول
اللقمه بتنده اكالها و الرزق نصيب
و الدنيا الدايره في احوالها
زي المجاذيب
الصبح معاك
و الضهر عليك
و الحظ لو ادى ما بينقيش
جربها و يمكن لو تديك
من جودك برضه ما تحرمنيش
قرب قرب
جرب جرب
و دي لعبة حظ ما فيش تكبيش
**
و الكوره تدور زي المقدور
تحرن على ناس
و تجامل ناس
و الشيخ سلمون شعبان مندور
واقف على اعصابه و محتاس
يلعب ع السته الخمسه تصيب
ينقل ع الخمسه الخمسه تخيب
و خلاص الحظ ادا له قفاه
و الحظ ان ولى بيبقى عجيب
كلها ساعتين
و صريخ سلمون لعل مقامات
نهاوند و سيكا و رست و صبا و حجاز و بيات
يا فلوس الناس يا خراب البيت
يا نهار الشوم
طب المسكين من طوله
و رفص يظهر مات
**
و الناس ملهيه في احواله
بيدوسوا عليه
و بتاع الكوره مشغلها حيبطل ليه!؟
و اللقمه بتنده اكالها طب ودا كل
دا ايه؟
**
الشارع نايم تحت جناح الليل همدان
وعيون النور تعبانه بتنعس ع العمدان
و الكون ملفوف بعبايه نسجها الليل بالخوف
و ف بحر الضلمه رأيت على بعد شبح
إنسان!
حققت بعيني
لقيتها يمامه و كاسره الطوق
كرابيج الليل ناقشيتها جراح
من تحت لفوق
و الاسى ف عنيها مصحى الشكوى
تقول حواديت
حواديت مالهاش علاقات بالشوق
و ليالي الشوق
**
مسيت و رميت ع الحلو سلام
قالت سلامين
انا قلت لوحدك ليه يا حمام ووليفك فين؟
مالك بالليل و الويل والرعب
خليك يا حمام عايش للحب
شالت بجناح حطت بجناح
ورتني جراح تحت الجناحين
وقالت لي زمان الحب ماراح
و بقى لنا سنين في الليل ضايعين
خد مني الليل واداني الليل
ورميت له الغالي بسعر زهيد
و سقاني الشهد و دقت الويل
و كساني حرير و لبست حديد
و عرفت الناس م الراس للديل
و آمنت بأن الكل عبيد
و قالتها و طارت في ثواني
و انا شارد و خيالي يصو
ر و غمزني الفجر و صحاني
و لقيت الكون بادي ينور
و صحيت من غفوة سرحاني
على صوت بيقول الله اكبر
الفاجومى
١١.٠٥.٢٠٠٧
حبيبة مشيت
هذا الشعور بأنك اليوم ينفطر قلبك ..
ينكسر
لا يتفتت ولكنه ينشطر فجأة الى نصفين
أول ابنة لى من دمى
جدتها هى امى مع امى
والدتها هى اختى مع اختى
خلانها وخالتها هم اخواتى منذ ولدت
وانا خالتها وبنت خالتها
وكنت سأسمع منها أول كلمة خالتو .. تاتو .. كما سمعتها منا جدتها .. خالتى الكبرى
فى العيد غيرلتها حفاضتها ولبستها هدوم العيد
وبعد العيد روحنا تانى وعملنا عيد ميلادها ..وكانت بتلف فى البيت لوحدها وماعرفناش ننام
ولما بنروح نلاقيها نايمة بنصحيها ونعمل اننا ماصحينهاش ..
بس حبيبة خلاص
مشيت
اللهم اجرنا فى مصيبتنا واخلفنا خير منها
