٤.١١.٢٠٠٦
رثاء الابرياء
لن يلاحقك المشعوذ بالهراء
او يذيب السحر قلبك فى الهباء
او تدور برأسك الاشباح حيرى
فــلتطب عيشاً بدنيا الرحماء
غــــاية حـقـقـتها فـيها الـهناء
فـليكن لحدك قـصر الشرفاء
فهو معروف لكل الاصدقاء
يـنـشـدون لـه رثاء الابـرياء
بحب شكسبير .. حد مش بيحب شكسبير
!
على فكرة المود ده مش كآبة .. مش عارفه بحسها اكتر نعى ..
نعى للبرائة او الفطرة والطهارة .. شكسبير كان فاهم معنى الجمال واعتقد ان رثاء الابرياء كان جزء من الجمال ..
او ربما نوع من الجمال الدموى .. زى الرواية الرومانسية اللى يموت بطلها فى النهاية .. المفروض تكون تراجيديا عشان البطل بيموت
بس هى رومانسية باعتبار ان اى تراجيديا موت مش ممكن تأثر على الحب والروماسية
..
السؤال الملل المعتاد..
حد فهم حاجة . والا انا بتكلم سنسكريتى كالعادة
!
مش مشكلة .. نكمل كلام ..
رون وانا كالعادة نتحدث عن الاخلاق .. اوكى انا وهيا شايفين العالم بصراحة وسورى جداً فى اللفظ ( زبالة ) بجد بجد
سيبوكم من توفى روح البى اللى العالم كله بالنسبة لها بالوعة مجارى محترمة تأكل فيها الفئران الصراصير
رانيا بتعتبر ان الاخلاق الكريمة فى الوقت الحالى للأسف اصبحت ( أولد فاشون )
: او كما تقولها بسخرية
" عصر الملكية انتهى ومفيش أحسن من الوقاحة وقلة الادب لأن للأسف دى سمة الزمن .. واحد فجأة لاقيتيه مخرج سلاح حاد وبيهددك بيه حتقفى تقوليلهنتكلم بالمنطق ! اساسا مع بداية الحديث عن اصل الاخلاق حتكونى سيادتك بدأتى تتحاسبى فى القبر وجنازتك بتخلص"
ومن هنا الاشكالية اللى مجننانى
هل علينا الاحتفاظ برقى الاخلاق فى زمن يعتبرها نقوش بائدة على الجدران ؟
هذا بغض النظر عن رأيى انا الحالى بعد اقتناعى الماضى بأن الطبقة الراقية اخلاقياً عليها فقط ان تثبت على ما هى فيه من سمو والا تنحدر الى اسفل مهما كان الاستفزاز ولكن هذا باعتبار ان هناك طبقة راقية اخلاقياً اساساً وليس مجرد افراد فى متاهة جحا
فى الواقع الأن اتركها للحالة المزاجية على الا اتعدى حد ما من الدنو الى مستوى الحياة التى نحياها
.
احياناً واحنا بنتناقش انا ورن مش بنكون مصدقين وجود بعض البشر حوالينا زى البت خضرة مثلاً
عندها كمية تسامح غريبة , ومش بعبط بالعكس ده بوعى وادراك تامين .. ممكن حد يفتكر انه بيستعبطها بس هى فاهمة ومطنشة "بعض الاشياء لا تستحق " وأجدع واحدة تقع فى الارض فى نص الشارع وتضحك وتقوم وتقول عادى الناس كلها بتقع وتقوم
بجد من غير سبيل فى حياتى انا ورون وغالباً كل اللى يعرفوها اعتقد ان مفهموم الاخلاق والجمال والانسانية كان حيسقط تماماً ..
كمان ساسو ..او ياسمين .. ممكن حد يلاقى ملاك ماشى على الارض ! ممكن .
نانو ارق بنت جدعة شوفتها فى حياتى ,
وشوشو اجدع واحدة تورط نفسها فى بلاوى من غير ما تقصد
واحمد صبرى اللى بيحاول يحتفظ بنفسه رغم كل شئ ومش عارفين حيكسب ولا لأ ..
وكتير اوى بس ماينفعش اتكلم عليهم كلهم
وناس موجودين حوالينا بس مانعرفهومش .. بنبصلهم وهما ماشيين فى الشارع وممكن نشد معاهم لو خبطونا سهواً واحنا مش واخدين بالهم انهم ماشيين يغنوا .." اكون او لا اكون" واحياناً
" هو المنفى اذا كان البقاء قرين ان نفنى "
لسه فى ناس فعلاً ماقدرتش سمات الزمن القاسية انها تاخد منهم حاجه .. يمكن اديتلهم الالم بس وحفرته فى قلوبهم وعقولهم .. بس مانالتش منهم غير الفشل فى جعلهم زى ما هيا عايزة واللى علينا اننا نخلى حياتهم اسهل شوية ,
اعقد ان على شكسبير ان يغير رثاء الابرياء او النعى لرثاء الزمن ويفضلوا الابرياء أجمل واسمى ومش لازم هما اللى يموتوا فى النهاية ..
ها .. نكون ولا لا نكون
وكيف نكون فى عالم لا يريد ان يكون
او يريد ان يكون من الطين نسخة بالكربون
؟
بس كده
